Kreu i delegacionit të BE-së në Tiranë, Luigi Soreca ka kërkuar nga palët politike që të vijojnë me zbatimin e marrëveshjes së 5 qershorit, e cila sipas tij u mirëprit nga Bashkimi Europian.
Soreca theksoi se Reforma Zgjedhore gjithashtu është kyçe për negociatat dhe anëtarërisimin e vendit në BE.
“Pa këtë kusht nuk mund të fillojë konferenca e parë. Ndryshimet Kushtetuese janë jashtë rekomandimeve të BE-së. Duhen bërë konsultimet përkatëse“, tha Soreca, teksa ishte duke kryer një vizitë në Kaninë të Vlorës.
Soreca foli edhe në lidhje me vendimin e BE-së për të mbyllur kufijtë me të gjitha vendet e Ballkanit Perëndimor, ku u shpreh se gjendja është mjaft serioze dhe vendimi për Serbinë dhe Malin e Zi u mor vetëm një ditë më parë.
