Ish-kryeministri Sali Berisha në kuadër të fushatës për kreun e PD-së u ndal sot në qytetin e Kukësit. Gjatë fjalës së tij, Berisha nuk kurseu akuzat për kryeministrin Edi Rama, të cilin e cilësoi përkrahës të Vuçiç.
Berisha u shpreh se Rama qëndron në krah të Vuçiç për të nxjerrë keq Albin Kurtin, ndërsa qëndrimin e tij e cilësoi si të një “skllavi”, me qëllim kryesor shkelmimin e interesit të shqiptarëve.
“Rama nuk kursen fjalë të mirë pa thënë për Vuçiçin për të nxjerrë Albin Kurtin apo atë tjetrin para Kurtit dhe udhëheqjen politike të Kosovës.
Po çfarë ndodh më këtë qëndrim? Pas shekujsh ne u bëmë të lirë. Në Kosova shqiptarët janë të lirë edhe në Shqipëri janë të lirë. Fuqia e një njeriu të lirë është e pakrahasueshme.”, theksoi lideri legjendar i PD-së.
Ish-kryeministri Sali Berisha u shpreh se PD është shpresa e vetme për shqiptarët për largimin e qeverinë aktuale.
“Në vend që të ndihemi të fuqishëm vazhdojmë të ndihemi të përgjysmuar. Dje na përgjysmonte kufiri dhe armiqësia ideologjike Enver – Tito. Sot po na përgjysmon qëndrimi filo serb, qëndrimi prej skllavi që mban Rama duke shkelmuar, interesin e çdo shqiptari.
Ne erdhëm nga shtator deri më sot duke kaluar çdo përpjekje. Lëvizja jonë ishte lëvizje idealiste dhe nuk mund të ndalej. Por sot kjo lëvizje, në këtë stacion ku kemi arritur ne ka një mision shumë herë më të rëndësishëm. Ka një mision më të vështirë, secili prej jush jeni këtu si misionarë që kapërcyen cdo vështirësi, çdo trysnin, çdo përpjekje për shantazh. Por PD nuk mund të jetë gjë tjetër, veçse mjeti që duhet të shpëtojë Shqipërinë nga ky regjim i cili është shqiptar, shqipfolës, por vepron sikur të mos ishte shqiptar.”, u shpreh Berisha.
Lideri legjendar i PD-së u ndal tek eksodi masiv i shqiptarëve në këto vitet e fundit, duke ia faturuar shqiptarëve.
“Kemi 9 vite me qeveri të Ramës. Në 9 vite shqiptarët jo që nuk kanë patur rritje rrogash, por ata që kanë marrë rrogë mesatare dhe të ulët, sot për shkak të rritjes së çmimeve marrin 50% më pak.
A nuk jemi kthyer sot ne një komb pa të ardhme? Po, sepse po iku rinia e një kombi i ikën e ardhmja. Dy gjera rrënojë të ardhmen e secilit prej nesh: Ikja e të rinjve dhe borxhi i tmerrshëm që ka rritur”, tha Berisha.
PD mban zgjedhjet për kreun e PD-së më 22 maj ku ish-kryeministri Sali Berisha garon përballë ish-kreut të degës së Kukësit, Ibsen Elezi.
