Skandali me publikimin e të dhënave të 910 mijë qytetarëve në Tiranë nuk përfundoi me nxjerrjen e të gjitha informacioneve të tyre, nga karta e ID-së, numrat e telefonit, banimi, punësimie, etj.
ABC ka siguruar edhe komentet e një pjese të patronazhistëve mbi qytetarët që kishin nën monitorim në pallat, lagje dhe zonat e tyre të caktuara nga shtabet e PS-së në qarkun e Tiranës.
Por, çfarë shkruanin patronazhistët për qytetarët që kanë nën vëzhgim dhe si komunikojnë me njëri tjetrin?
Një rrjet i gjerë i sofistikuar që kontrollon dhe përçon gjithçka me “procesverbal”. Për të lëkundurit urdhri është që “të mbahet në monitorim”.
Shqetësim vërehet te të ardhurit që sapo kanë bërë zhvendosjen me dokumente në Tiranë. “Nuk e njeh njeri ka bërë pasaportizimin ke pallati i beqarëve, por nuk e di askush kush është”.
Një tjetër informon qendrën e partisë se objektivi që monitoronte “E kishte me dy mendje nqs do të votonte ose jo”.
Për të pavendosurit nuk hiqet dorë lehtë. “Nuk voton për shkaqe feje, por do mbahet në vëmendje që t’i mbushet mendja”,- shkruan një tjetër.
Por ka edhe shumë të pakënaqur, kontingjent që edhe vetë PS-ja i trembet. “Familja në zgjedhet e 2019 votuar PS, por hatërmbetje, pasi një nga famijarët është larguar nga puna”,- është një tjetër koment i patronazhistit.
“Z. Gega është me bindje socialiste, por momentalisht i zhgënjyer per mosdhënien e një leje nga njësia administrative”,- është një tjetër koment.
Në shënjestër kanë qenë edhe sipërmarrjet. “Bisnes privat lokal ka qene LSI kthyer në PS”.
Por, ka edhe vota me kusht. “Nese i legalizohet shtëpia do të votojë për PS”. “Janë LSI, Hajriu është polic krimesh në Kukës, kërkon transferim në Tiranë të kthej”,- është një tjetër koment i patronazhistit, që njofton qendrën e partisë që të lëvizë.
