Në lidhje me ndërtimin që ka filluar prej gati dy javësh në brendësi të Butrintit, pranë një muri të lashtë, ministrja e Kulturës Mirela Kumbaron ka thënë se ndërtimi është me leje dhe se është konsultuar me UNESCON.
Në brendësi të Parkut Arkeologjik të Butrintit në Sarandë kanë filluar punimet për ndërtimin e një objekti në brendësi të zonës së mbrojtur. Ndërtimi po bëhet pranë një muri prehistorik, i cili daton në shekullin e 7-8 para Krishtit. Mësohet se në brendësi të zonës së mbrojtur po ndërtohet një bar-kafe për qëllime biznesi.
Drejtoria e Monumenteve pranoi se ka dhënë lejen dhe nuk shikon asgjë të çuditshme. Ndërsa në reagimin e saj Ministria e Kulturës thotë se është një strukturë e përkohshme, madje sipas parametrave të parashikuara nga konventat e UNESCO-s dhe vendimit të Këshillit Kombëtar të Arkeologjisë.
