Rruga nacionale Klos-Burrel është në gjendje tepër skandaloze në të gjithë gjatësinë e saj. I vetmi investim që është bërë, por jo sipas standardeve të rehabilitimit të një rruge nacionale, është mbushja e gropave me zhavorr.
Sipas specialistëve teknikë të infrastrukturës rrugore, hedhja e zhavorrit mbi asfalt është e rrezikshme, pasi bëhet burim për aksidente automobilistike.
Por ai që është bërë ferr për drejtuesit e mjeteve është segmenti në hyrje të qytetit të Klosit, që për to është një turp i madh, që në vitin 2018 Shqipëria të ketë një rruge nacionale në këtë gjendje skandaloze.
Në këto kushte drejtuesit e mjeteve në Qarkun e Dibrës u bëjnë thirrje të gjithë qytetarëve të këtij qarku të bashkohen për të protestuar duke bllokuar rrugën nacionale, derisa të nisin punimet për rehabilitimin e segmentit nacional nga Burreli në Klos.
Deputetja e Partisë Demokratike Dhurata Çupi ka denoncuar mungesën e vëmendjes së qeverisë ndaj qarkut të Dibrës. Çupi thotë se qeveria aktuale për 5 vite nuk ka bërë asgjë për këtë qark, e mbi të gjitha në rrugën nacionale Skuraj-Peshkopi, të cilën sipas saj e ka lënë në mëshirë të fatit.
