BBC ka pranuar se intervista e bujshme me princeshën Diana në vitin 1995 ishte marrë përmes manipulimeve. Gazetari Martin Bashir kishte përdorur disa deklarata bankare të falsifikuara për të fituar besimin e princeshës për intervistën. Skandali ka shkaktuar shumë bujë në opinion dhe ka sjellë reagime të ashpra.
BILD
E vërteta më në fund po del në dritë. Por ajo nuk do e kthejë mbrapsht nënën e tyre.
Në vitin 1995, princesha Diana dha një intervistë spektakolare për gazetarin e BBC, Martin Bashir. Më shumë se 23 milionë persona ndoqën intervistën ku u zbuluan shumë gjëra. Nëna e Harry dhe William, e cila ishte 34 vjeç në atë kohë, foli për gjithçka nga shpirti i saj. Tregoi për çrregullimet me të ushqyerit, depresionin, presionin e familjes mbretërore dhe për problemet martesore me të shoqin, princin Charles.
Tani ka dalë në dritë fakti se gazetari Martin Bashir e ka marrë intervistën me ndihmën e mashtrimeve.
William dhe Harry kanë reaguar me fjalë të egra kundër BBC pas këtij zbulimi.
Harry, 36 vjeç, fajëson median për vdekjen e Dianës. “Pasojat e një kulture të shfrytëzimit dhe praktikave joetike i kushtuan jetën. Nëna jonë humbi jetën si pasojë e kësaj,” tha ai.
William reagoi me një video-mesazh. Ai tha se kjo intervistë kontribuoi në mënyrë të rëndësishme në përkeqësimin e marrëdhënieve mes prindërve të tij. “Unë mendoj se mënyra mashtruese me të cilën u zhvillua intervista ndikoi thelbësisht në ato që tha nëna ime”.
Dështimi i BBC në rolin mbikëqyrës “kontribuoi ndjeshëm që të shtohej frika, paranoja dhe izolimi” i nënës në vitet e fundit të jetës së saj, kritikoi William. Ai kërkoi që intervista e Lady Di të mos transmetohej më kurrë.
