Pronat e ushtrisë dhe bazat ushtarake vijojnë të copëtohen nga koncesionet e qeverisë për privatët. Në vend që ato të administrohen nga shteti, po tjetërsohen duke iu kaluar bizneseve. Kjo çështje pritet të diskutohet nesër në Kuvend, pasi deputeti i Partisë Demokratike, Ferdinand Xheferaj ka thirrur në interpelancë ministrin e Mbrojtjes Niko Peleshi. Interpelanca është futur në rendin e ditës së Kuvendit dhe do të zhvillohet në seancën e radhës plenare, nesër, të hënën.
Deputeti Xhaferaj thekson se prej një kohe të gjatë në media janë publikuar artikuj, ku shprehet shqetësimi për dhënien pa kriter të territorit të bazave luftarake për projekte turistike dhe më gjerë.
Procedurat kanë filluar që më janar të 2016, ku qeveria lëshoi dritën jeshile për dhënien me koncesion të pronave përmes Shefit të Shtabit të Përgjithshëm të Forcave të Armatosura.
Baza e Kuçovës
Nga njëra anë, baza ajrore i jepet NATO-s, nga ana tjetër ministri i Mbrojtjes jep me qira zyrën e komandës së kësaj njësie.
Sipas kërkesës, ministri do të japë llogari nesër për statusin e pronës nr. I 018. ish-venddislokimi i Shtabit të Vjetër të Bazës Ajrore Kuçovë, Berat të dhënë me qira më datë 29.07.2016, në përputhje me listën e pronave në Planin e Përhapjes dhe Vendosjes së miratuar nga Komandanti i Përgjithshëm në vitin 2014.
Baza e Shëngjinit
Kështu, pritet që nesër të sqarohet Plani i Përhapjes dhe Vendosjes së miratuar nga Komandanti i Përgjithshëm në vitin 2014 prona nr. 1311 “Ish Baza Ndihmuese”, Shëngjin- Lezhë
Baza e Sarandës
Në dokumentin që deputeti Ferdinand Xhaferaj ka publikuar kërkesën për interpelancë, ministri i mbrojtjes Niko Peleshi do të sqarojë nëse është ndjekur procedura e parashikuar nga Ligji nr. 64/2014, “Për pushtetet dhe autoritetet e drejtimit dhe komandimit ne FA” për dhënien me qira të të gjithë sipërfaqes së Bazës Detare Sarande (Prona nr. 696 “Baza Ndihmuese ‘” Limion. Siç dihet, kjo bazë i është dhënë me koncesion 35 vjet. subjektit “Kastrati Group”.
Koncesioni i portit të jahteve “Marina Limion” në Sarandë duket se është fituar nga Kastrati dhe Edil-Al. gijotina.com
