Bashkia e Tiranës ka vendosur që një nga qendrat sociale të Tiranës ta kthejë në një strehë të përhershme për këdo që jeton në situatë rruge në kryeqytet
Në takimin përmbyllës të projektit “Ngritja e kapaciteteve të Shërbimit Social Shtetëror”, kreu i Bashkisë së Tiranës, Erion Veliaj theksoi se situata e emergjencës që kaloi Tirana ditët e acarta të javës së shkuar, nxorri në pah nevojën për zgjidhje afatgjatë të problemit të të gjithë atyre që jetojnë në kushte rrethanore.
Veliaj gjithashtu deklaroi se për t’u ardhur në ndihmë atyre që janë në nevojë ka krijuar një fond të veçantë ushqimesh dhe veshmbathjesh.
Kryebashkiaku tha se Bashkia e Tiranës ka filluar edhe një program ambicioz për strehimin social, ku përveç bonusit të qirasë, një vëmendje të veçantë do t’i kushtohet edhe hapjes së programit të kredive të buta për banesa, kryesisht për çiftet e reja.
Veliaj: “Çështja e personave në situatë rruge duhet trajtuar përtej emergjencave. Nga 7 qendrat që funksionuan për menaxhimin e situatës, një prej tyre do të kthehet në një qendër permanente për dikë që është në situatë rruge dhe do të kalojë natën, të plotësojë nevojat e veta higjieno-sanitare dhe të ketë një strehë në kokë, sidomos në net si ato që kaluam.
Pavarësisht se shteti u përgjigj si kurrë më parë, besoj se bashkitë janë akoma më pranë qytetarëve. Kemi marrë një vendim, nisur edhe nga solidariteti që pamë në qytetin e Tiranës, në çadra, batanije, ushqime, dyshekë, ushqime, për të krijuar një rezervë të qytetit, ashtu siç janë rezervat e shtetit. Bashkia e Tiranës ka identifikuar një magazinë ku do të bëjë një imitim në miniaturë të rezervave të shtetit, për rezervat e qytetit. Besoj se qytetet e mëdha, të gjitha mund ta bëjnë këtë, pra për të pasur për çdo ditë një sasi të konsiderueshme shtretërish, veshmbathje dhe ushqime për raste nga më të ndryshmet.”
Projekti i organizuar nga “Balkan youth Link Albania” dhe Instituti “Benussi”, me mbështetjen e UNICEF dhe Zyrës Zvicerane për Zhvillim, u realizua me qëllim ngritjen e kapaciteteve të administratës së Shërbimit Social Shtetëror, përgjegjës për monitorimin e politikave të mbrojtjes sociale dhe në veçanti në fushën e ofrimit të shërbimeve të kujdesit social.
