Në një kohë kur Ankaraja po përpiqet të luajë rolin e ndërmjetësit në bisedimet e armëpushimit Rusi-Ukrainë, kontaktet mes Uashingtonit dhe Ankarasë janë intensifikuar më tej deri në pikën se çështja e S-400 ruse është ngritur sërish.
Një propozim “bombë” thuhet se është bërë nga SHBA në Turqi. Sipas New York Times, SHBA kanë propozuar që Turqia të dërgojë në Ukrainë në funksion të mbrojtjes ajrore pikërisht sistemet ruse S-400, të cilat janë blerë e posedohen nga Ankaraja. E gjitha kjo, në këmbim të kthimit të Turqisë në programin F-35, nga i cili u përjashtua pikërisht sepse kishte proceduar me blerjen e S-400 rus.
Kjo, natyrisht, do të nënkuptonte se marrëdhëniet e Turqisë me Rusinë do të “siluroheshin” pasi ajo do të merrte anën e Ukrainës, ndërkohë që lufta është në kulmin e saj. Ky skenar komentohet nga gazetari David Sanger i New York Times.
Sipas tij, propozimin përkatës amerikanët tashmë ia kanë komunikuar palës turke, e cila megjithatë nuk e ka komentuar (deri më tani), as nuk ka dhënë ndonjë përgjigje.
