Bashkia e Durrësit ka nisur më në fund kontrollin e kushteve të sigurisë në plazhet përgjatë gjithë vijës bregdetare.
Punonjësit e bashkisë u lanë subjekteve private një afat tre ditor për të plotësuar këtë detyrim ligjor.
“Me urdhër të kryetarit të bashkisë kemi dalë në të gjithë territorin, kemi marrë kontakte me bizneset që kanë marrë përsipër të ndërtojnë këto kulla të vendosin personat për të kryer funksionin e sigurisë dhe ne do ti monitorojmë nga dita në ditë deri sa të arrijmë rezultatin që kërkojmë”, thotë Abdyl Koka, bashkia Durrës.
Një tjetër problem është mungesa e sinjalistikës për hapësirën e lejuar për not.
Kryetari i Bashkisë Vangjush Dako paralajmëron edhe një herë heqjen e licencës për privatët që nuk do të plotësojnë kushtet e sigurisë edhe pas këtij kontrolli të parë.
Në të gjithë vijën bregdetare të Durrësit ushtrojnë aktivitetin rreth 300 subjekte private.
