Familjarët e Mentor Rexhës, shqiptarit që u gjet i vdekur në një burg në Francë këmbëngulin se ai është vrarë dhe jo vetëvrarë në qeli.
Familja e tij që banon në lagjen “Daniel Matlia” të qytetit të Shkodrës, ka hapur dyert e mortit për birin e saj 36 vjeç duke mos pranuar versionin e autoriteteve franceze.
Ata shprehen se djali i tyre është dhunuar dhe nuk ka kryer vetëvrasje, siç u kanë deklaruar autoritetet e burgut. Ata madje kanë vënë në dispozicion edhe foto ku paraqiten shenjat e dhunës në trupin e pajetë të të riut.
Gjithashtu familjarët i bëjnë thirrje Qeverisë Shqiptare të ndërhyjë për sqarimin e kësaj ngjarje.
“I bëj thirrje shtetit shqiptar që ta zbardhë këtë ngjarje, djali nuk ka kryer vetëvrasje por është dhunuar në burg. Lajmin e kemi marrë nga shokët e tij që na kanë treguar sepse askush tjetër nuk na ka lajmëruar për vdekjen e djalit. Djali kishte një vit që ishte në Francë dhe 6 muaj kishte në burg se akuzohej për djegien e disa makinave. Ka qënë duke folur me vëllain në telefon kur e kanë arrestuar. Gjatë kohës që kemi folur në telefon nuk na ka shprehur shqetësime dhe ne jemi të bindur se nuk ka kryer vetëvrasje. Kërkojmë që të hetohet sepse në trup ka shenja dhune. I bëj thirrje shtetit të më kthejne trupin e djalit dhe të zbardhet ngjarja. Fëmijët i kam rritur me halle”, tha Rukije Rexha, nëna e Mentorit.
Ndërsa djali i xhaxhait të tij Selaudin Rexha tha se “Ambasada shqiptare në Francë nuk na është përgjigjur por na është shprehur në mënyrë absurde kur i kemi kërkuar ndihmë dhe të gjitha veprimet janë duke i kryer vëllai i viktimës me të motrën e tij. Akuzat ndaj kushëririt tim janë të pavërteta. Ky është rasti i 5 i shqiptarëve që vriten në burg dhe dy janë nga Shkodra, ndërkohë që shteti hesht.
