Kreu i Partisë Demokratike, Sali Berisha, ka mbajtur një fjalim të ashpër gjatë mbledhjes së grupit parlamentar të PD-së, ku ka deklaruar se shqiptarët dhe partnerët ndërkombëtarë presin nga opozita një zgjidhje për situatën dramatike në vend.
Në hapje të fjalës së tij, Berisha uroi deputetët dhe qytetarët për vitin e ri, por theksoi se Shqipëria e nisi këtë vit në një gjendje të rëndë krize, të shoqëruar nga përmbytje masive dhe dështim të shtetit për t’u ardhur në ndihmë qytetarëve.
Sipas tij, përmbytjet që prekën zona të gjera të vendit, nga Gjirokastra në Shkodër dhe veçanërisht qarkun e Durrësit, nuk ishin thjesht pasojë e kushteve atmosferike, por rezultat i drejtpërdrejtë i korrupsionit dhe keqqeverisjes.
Berisha akuzoi qeverinë se jo vetëm nuk ishte mbështetje për qytetarët, por ishte shkaktare e thellimit të situatës për shkak të mungesës së investimeve në infrastrukturën kundër përmbytjeve dhe menaxhimin e emergjencave.
Ai deklaroi se në ujërat që përmbytën mijëra banesa, sipas tij, “u përmbyt edhe morali i kalbur i qeverisë”, duke shtuar se ndërsa qytetarët përballeshin me pasojat e fatkeqësive, zyrtarët vijonin ahengjet dhe udhëtimet.
Kreu i PD-së theksoi se në çdo shtet normal, emergjencat natyrore janë prioritet absolut i sigurisë kombëtare, ndërsa në Shqipëri, sipas tij, fondet publike janë shpërdoruar për afera korruptive.
Duke iu referuar edhe zjarreve të verës, Berisha akuzoi qeverinë për mashtrim lidhur me përdorimin e satelitëve për monitorimin e vatrave të zjarrit, duke thënë se korrupsioni i ka lënë qytetarët të pambrojtur përballë fatkeqësive, me pasoja tragjike për njerëz, familje dhe banesa.
Në përfundim, Berisha u shpreh se PD-ja ka përgjegjësinë historike për t’i dhënë vendit një alternativë dhe zgjidhje, duke theksuar se kjo është pritshmëria jo vetëm e shqiptarëve, por edhe e partnerëve të Shqipërisë në Europë dhe në botë.
