Ish-kryeministri Sali Berisha ka konfirmuar zërat se do të hyjë në koalicion me LSI dhe partitë e tjera opozitare në zgjedhjet lokale të 6 marsit. “Shtëpia e lirisë” , kështu do të quhet koalicioni i partive opozitare krah ish-kryeministrit Sali Berisha.
I pyetur nga gazetarët nëse ndihet keq që kandidatët që kanë qenë pjesë e PD që nga themelimi do të shkojnë në zgjedhje me logon e LSI, Berisha akuzoi Ramën për konfiskim të logos së PD.
“LSI është padiskutim është pjesë e këtij koalicioni, ne po shohim modalitetet. Po negociojmë dhe me parti të tjera por po punohet për çështje teknike për mundësinë e bashkëpunimit sipas ligjit zgjedhor. Logoja është logo koalicioni. Koalicioni do të quhet shtëpia e lirisë. Shtëpia e lirisë do të ketë logon e vetë. Kjo është normale, në çdo koalicion logoja nuk është e partisë por e koalicionit. Rama do ta paguajë shtrenjtë këtë konfiskim”, tha Berisha.
