Shtëpia e klerikut Atë Gjergj Fishta rrezikon të shembet. Paulin Zefi, ish-përgjegjës i Kulturës Kombëtare në Lezhë ka kërkuar nëpërmjet një letre drejtuar institucioneve të shtetit shqiptar, që të ndërhyhet menjëherë për restaurimin e objektit, i cili mbrohet me ligj që pas vitit 1991.
Ka reaguar gjithashtu edhe Forumi për Mbrojtjen e Trashëgimisë, i cili shprehet se së shpejti do të nisë një fushatë të fortë për promovimin e formësimin e poetit.
“Braktisja afatgjatë e kësaj shtëpie, mungesa e plotë e ndërhyrjeve restauruese për mirëmbajtjen e saj të vazhdueshme dhe shumë faktorë të tjerë, kanë shkaktuar amortizimin e saj të tejskajshëm. Prandaj, ka disa vite që rrezikon shembjen e plotë, ku gjendja fizike e këtij objekti është jashtëzakonisht alarmante. Amortizimi i kësaj shtëpie ka ardhur si rezultat i braktisjes dhe i pamundësive financiare nga ana e pronarëve të saj, por sidomos nga neglizhenca totale e institucioneve shtetërore kompetente që nga viti 1991 e deri më sot”, ka shkruar ai. Zefi ankohet edhe për eshtrat e Fishtës.“Varri i Fishtës brenda Kishës Françeskane rënkon krejtësisht i zbrazur nga eshtrat e tij, të cilët ose janë hedhur në lumin Buna, ose prehen dhunshëm diku tek selvia nr. 4. pas Kishës Mortore tek varrezat e Rrmajit”, shkruan Zefi.
Gjergj Fishta u lind në një familje fshatare në Fishtë të Lezhës më 22 tetor të vitit 1871 nga babai Ndok Simoni dhe e ëma Prene Lazër Kaçi, të cilët ishin të paarsimuar për shkak të pushtimeve osmane, kur shkollimi ndalohej. E vetmja dëshmi që tregon se aty ka jetuar Fishta është pllakati në të cilën shkruhet: “Këtu ka banuar Atë Gjergj Fishta, 1871-1940”.
