Bylisi ka mundur Elbasanin në sfidën e javës së 17-të me rezultatin 3-2. Takimi i luajtur në “Adush Muça” të Ballshit foli për vendasit, të cilët kaluan në avantazh me Mustapha në minutën e 44’.
Ishte sërish sulmuesi nga Nigeria i cili dyfishoi shifrat tre minuta pas startit të pjesës së dytë. Në minutën e 52’, Loukili rihapi takimin, por pas tre minutash, Mustapha kompletoi tripletën personale.
Në minutën e 69’, Blaise Tsague shënoi golin e dytë për verdheblutë, i cili shërbeu vetëm si statistikë.
Kështu Elbasani humbet shansin për të rimarrë vendin e parë duke barazuar me 3 humbje në 17 javë Egnatian që mbetet në krye me 2 pikë më tepër, ndërsa Bylisi largohet nga zona play out.
Trajneri i Elbasanit Ivan Gvozdenovic foli për mediat pas humbjes befasuese kundër Bylisit në stadiumin “Adush Muça”. Kjo disfatë ka bërë që ata të humbin kreun në Superiore:
“Nuk kemi probleme me mungesat. Sot Bylis ishte më agresiv për topin e dytë. Pjesa e parë u vendos nga goli i tyre për fajin tonë. Mund të kishim barazuar. Kemi shpejt edhe javën e fundit për këtë vit ndaj Tiranës.
Presioni? E ka çdo skuadër. Nuk është çështje presioni. Bylis është i fortë në shtëpi, ndërsa ne luftuam. Ndoshta edhe unë do mendojë diçka pak më ndryshe rreth rolit të Kasës.
Nëse do kisha opsion më të mirë, do reagoja, por nuk kisha mundësi tjetër. Kasa bëri maksimumin nga krahu i djathtë. Mbrojtja? 3 gola të pësuar janë shumë. Nuk ishte dita jonë. Të gjithë golat e pranuar erdhën prej gabimeve tona”.
