Një 53-vjeçar shqiptar humbi jetën në Itali në rrethana që mbeten ende për t’u sqaruar teksa ishte duke u kthyer për në shtëpi në përfundim të turnit të punës.
Viktima dyshohet të ketë rrëshqitur dhe përfunduar në një kanal në Sile, me fytyrën përmbys në vijën e ujit që nuk i kalonte 20 centimetra.
Bëhet fjalë për 53-vjeçarin Gëzim Muho, i cili punonte si pjatalarës në një restorant të njohur me emrin Vecio Piave, në Caposille, në zonën e San Dona.
Viktima u gjet nga një kalimtar i rastit pasditen e së hënës, teksa po lëvizte me mjet.
Pavarësisht njoftimit të ndihmës së shpejtë, Muho u deklarua i vdekur.
Siç raportojnë mediat italiane, 53-vjeçari ishte duke shkuar për në shtëpi në këmbë, kur rrëshqiti në rrethana ende të paqarta dhe përfundoi në kanal.
Dyshohet se vdekja e shqiptarit mund të ketë qenë aksidentale dhe rrëshqitja mund të ketë ndodhur si pasojë e ndonjë problemi të tij shëndetësor.
Muho jetonte në Itali prej disa vitesh, i vetëm dhe jo shumë larg vendit ku u gjet i vdekur.
