Gitea Mema mund të jetojë falë jush. Ajo është vetëm 22-muajshe por jeta e saj për dy vitet e ardhshme do të jetë në dyert e spitalit. Vogëlushja është diagnostifikuar me leuçemi akute limfoblastike (kancer në gjak) dhe duke e pasur të pamundur të kurohet në Shqipëri prindërit e kanë dërguar në Gjermani.
Por fatura e spitalit është tepër e lartë, familja nuk mundet ta përballojë. Vetëm duke u bashkuar të gjithë, me kontribut sado minimal mund ta ndihmojmë Gitean e vogël.
Prindërit e Giteas shkruajnë:
Më 20 maj të këtij viti vajza jonë u dignostifikua me infeksion urinar dhe u trajtua me antibiotikë, më pas u detyruam që vogëlushen tonë 22-muajshe ta dërgojmë me urgjencë në Spitalin e Pediatrisë në Tiranë. Ajo ishte e zbehtë dhe shumë e dobët dhe pas analizave rezultoi se kishte Leuçemi akute limfoblastike.
Ishte e pabesueshme për ne dhe vendosëm ta dërgojmë në Gjermani. Spitali Universitar i Saarland-it pranoi që vajza jonë të kurohej aty dhe kërkoi që menjëherë të nisë mjekimi.
Princesha jonë ka nevojë të mjekohet për rreth dy vite, një trajtim që ka filluar prej 24 majit dhe është shumë i kushtueshëm. Kostoja e shpenzimeve të kërkuara nga spitali është shumë e madhe dhe kjo është arsyeja se përse ne kërkojmë mbështetjen tuaj financiare gjatë këtij momenti të vështirë për vajzën dhe të gjithë familjen tonë.
Faleminderit Lenti dhe Irena Mema
