Shqipëria do të prezantohet në Bienalen e Venecias në një mënyrë të pazakontë dhe inovative, madje duke shtuar në listën e autorëve të këngëve dhe një emër të njohur grek, ish-ministri i Financave në Greqi, Yanis Varoufakis.
Siç raporton BIRN, Varoufakis ka shkruar një nga këngët polifonike që bën fjalë për emigrimin, është historia e një babai që nuk e shikon vajzën e tij. Një prej kuratorëve të pavionit shqiptar, arkitekti amerikan Simon Battisti tha për BIRN se teksti i Varoufakis është shumë personal. “Ai rrëfen në tekst historinë e tij të jetës jashtë shtëpisë, i ndarë prej të bijës, duke jetuar larg saj”.
E veçanta e prezantimit në Bienale është se tekstet e këngëve janë shkruar nga personalitete shqiptare dhe të huaj. Shqipëria do të këndojë muzikë polifonike me katër grupe të ndryshme popullore nga Tirana, Himara, Fieri dhe Vlora.
Organizatorët u kanë kërkuar disa muaj më parë dhjetë personaliteteve- poetë, shkrimtarë, arkitektë dhe artistë- të gjithë me eksperiencë në emigrim, që të shkruajnë tekste për emigrimin.
Projekti shqiptar titullohet “Të kam lënë malin”.
