28 të vdekur dhe 61 të plagosur është bilanci i deritashëm pas shpërthimit me eksploziv në kryeqytetin e Turqisë, Ankara. Një mjet ushtarak është hedhur në erë pranë një baze ushtarake, 200 metra larg Parlamentit të Turqisë.
Guvernatori i Ankarasë, Mehmet Kılıçlar, raportoi se nga shpërthimi 28 persona kanë humbur jetë dhe 61 të tjerë janë lënduar.
Nuk ka ende të dhëna zyrtare, por dyshohet se është akt terrorist. Qyteti është mbërthyer nga paniku, njerëzit kanë boshatisur rrugët dhe metrotë. Ndërkohë forca të shumta policie dhe autoambulanca ndodhen në vendngjarje.
Ndërsa Ministria shqiptare e Mbrojtjes ka bërë me dije nëpërmjet një komunikate për shtyp se kadetët shqiptarë që kryenin studimet në këtë bazë janë të gjithë shëndoshë e mirë.
