Shpërthimi i një sasie tritoli ka tronditur banorët e një pallati në Burrel gjatë orëve të para të mëngjesit të sotëm. Bëhet me dije se lënda eksplozive është vendosur pak metra larg derës së kryetarit të Bashkisë së Matit, Nezir Rizvani.
Lënda plasëse ishte vendosur në shesh pushim me një distancë 160 cm larg derës së banesës të shtetasit M.B., rreth 55 vjeç, dhe 2 metra larg derës së banesës të shtetasit Nezir Rizvani, 53 vjeç, Kryetar i Bashkisë Mat.
Në të dy banesat e shtetasve M.B, dhe N.R, nuk ka patur asnjë njeri në banesë. Si pasojë e shpërthimit janë dëmtuar pjesërisht dy dyert e banesave të shtetasve të lartpërmendur.
Dyshohet se sasia e lëndës plasëse të ketë qenë rreth 50 deri në 100 gramë. Grupi hetimor vijon hetimet në vendin e ngjarjes, si dhe po punohet në mënyrë intensive për identifikimin dhe kapjen e autorit/ëve.
