Gjykata e Tiranës ka lënë në fuqi masat e sigurisë për zyrtarët e Bashkisë së Tiranës dhe të Inspektoratit të Mbrojtjes së Territorit, të akuzuar për shpërdorim detyre dhe falsifikim dokumentesh në procesin e shembjes së pallateve të dëmtuara nga tërmeti i vitit 2019 në zonën e Kombinatit.
Togat e zeza vendosën që Aurel Çuko, Aurel Boriçi dhe Sokol Qehajaj të vijojnë të qëndrojnë në masën “arrest shtëpie”, ndërsa Elena Guçe, Rexhina Rakipi, Aleksandra Mahmutllari, Shyqyri Maloku dhe Fatmir Firi do të hetohen nën masën “detyrim paraqitje”.
Hetimet kanë nisur për pallatin nr. 140, i shembur në janar 2020 me mjetet dhe fondet e Bashkisë së Tiranës, e që më pas u fut sërish në një tender publik bashkë me 14 ndërtesa të tjera të klasifikuara si të dëmtuara nga tërmeti. Sipas Prokurorisë së Tiranës, ky nuk është rasti i vetëm: dyshohet se përveç pallatit nr. 140, edhe pesë ndërtesa të tjera janë përfshirë në tender dhe paguar për t’u shembur, ndonëse rezultonin të rrafshuara më herët.
Hetimet për aferën vijojnë, ndërsa prokuroria po verifikon procedurat dhe përgjegjësitë e zyrtarëve të përfshirë në procesin e rindërtimit në Kombinat.
