Tragjedia në Kosovë ku një person i maskuar qëlloi me armë kundër një autobusi me nxënës në Gllogjan të Deçanit u mori jetën tre personave, dy nga të cilët në moshë fare të re. Ditën e sotme është mbajtur ceremonia mortore për ta dhe në varrim kanë qenë të pranishëm figura të njohura si Kryetari i Deçanit, Bashkim Ramosaj, Kryeministri Albin Kurti e Kryetari i AAK-së, Ramush Haradinaj.
Gjatë ceremonisë ka marrë fjalën edhe nje nga shoqet e nxënësve të vrarë e cila para të pranishmëve ka lexuar një shkrim prekës për viktimat. Ajo shkruan duke i pyetur pse pse nxituan aq shumë atë natë e se nëse do kishte mundësi do i shtrëngontë fort e nuk do i lëshonte më kurrë. Nxënësja shkruan se maturës do i vendosin emrin e tyre dhe nuk do i harrojnë kurrrë. Mes lotëve ajo thotë se nuk dinë si ta luftojnë dhimbjen e s’do e falin kurrë vdekjen e dy të rinjve nga dora kriminale që u mori rininë. Me dhimbje ajo u lutet të kujdesen nga lart për ta pasi ata dështuan t’i mbronin. Ajo u jep ngushëllimet familjes dhe nxënësve që i kishin miq e ndanin koghën me ta dhe ngushëllime i ka dhënë dhe Gllogjan për të cilin thotë se është mësuar t’i vriten trimat dhe fëmijët.
“Si mund t’ju them lamtumirë kur jeta juaj sapo kishte filluar. Ledjan, Genta…kur u ndamë pse nuk më treguat se nuk do shiheshim më kurrë. Do ju shtrëngoja më fort, do ju përqafoja e nuk do t’ju lëshoja më kurrë. Genta detyrat i ke lënë të papërfunduara. Fletoren e shënimeve kujt ja le? Pse nuk më tregove atë natë kur u ndamë? Pse nxitove aq shumë atë natë për t’u ngjitur në atë autobus. Genta a i the nënës që ta gjeje darkën në tryezë? A i tregove Gentës Ledjan se çfarë doje të haje në darkë? O zot çfarë shije ka kjo vdekje! O zot pse na dhe një dhimbje kaq të madhe. Ledjan, Genta pse s’na treguat të paktën si ta luftojmë këtë dhimbje dhe këtë trishtim.Do jeni përherë në zemrat tona e në shpirtin tonë. Nuk do t’ju harrojmë kurrë. Mallkuar ajo dorë që ju ndau nga ne. Lamtumirë o ëngjëjt e mirësisë. Na keni këputur shpirtin. Kujdesuni për ne atje lart se ne nuk mundëm të kujdesemi për ju këtu poshtë. Maturës do t’i japim emrin tuaj, dhimbjen do ta luftojmë me mirësinë tuaj por vdekjen tuaj s’do ta falim kurrë. Ngushëllime prindër, ngushëllime nxënës, ngushëllime Deçan, ngushëllime Kosovë e në fund ngushëllime Gllogjan i trimave. Gllogjan, je mësuar duke t’u vrarë trima dhe fëmijë. Ngushëllime të gjithëve”, tha ajo.
