Një tjetër shkollë në Tiranë është kthyer në vend krimi teksa një nxënës 14-vjeç është plagosur me thikë.
Ngjarja ka ndodhur një ditë më parë në zonën e Bregut të Lumit. Sipas policisë, konflikti mes dy 14-vjeçarëve me njeri-tjetrin në shkollën 9-vjeçare “Kolë Jakova” ka përfunduar në plagosjen e njërit prej tyre me mjet prerës.
“Specialistët për Hetimin e Krimeve në Komisariatin e Policisë Nr. 3 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë për një të mitur 14 vjeç, banues në Tiranë. Ditën e djeshme, më datë 11.11.2024, në ambientet e shkollës ‘Kolë Jakova’ 14-vjeçari është konlfiktuar me një bashkëmoshatarin tij dhe gjatë konfliktit, ky i fundit është dëmtuar me mjet prerës. Aktualisht ndodhet në spital, në kujdesin e mjekëve. Materialet i kaluan Prokurorisë”, njoftoi këtë të martë Policia e Tiranës.
Që prej nisjes së vitit të ri shkollor, ngjarja e së hënës shënon krimin e disatë me të plagosur që ndodh brenda shkollave.
Gati dy javë më parë, policia raportoi se një nxënës 18-vjeçar u plagosur me thikë në oborrin e gjimnazit “Shote Galica” në Fushë-Krujë, në vazhdën e një konflikti me një bashkëmoshatar.
Ndërsa në Shtator, Policia raportoi për një plagosje me mjet prerës së një nxënësi 15-vjeçar gjatë një konflikti në oborrin e shkollës private “Mrekullia” në kryeqytet.
Që prej nisjes së vitit shkollor, Policia ka shpërndara në disa raste njoftime për rritjen e prezencës në institucionet arsimore me qëllim shtimin e sigurisë. Pavarësisht kësaj, krimet kundra jetës, si plagosjet me armë të ftohta, vijojnë të ndodhin.
