Ëngjëll Cani, babai i të ndjerit Martin Cani, i cili u vra një vit më parë me thikë nga bashkëmoshatari i tij pranë shkollës “Fan Noli”, ka folur sërish mbi ngjarjen.
Ai ka akuzuar se shkolla “Fan Noli”, është sipas tij shkaku i parë i kësaj ngjarjeje, pasi nuk i ka dërguar asnjë mesazh as për ta lajmëruar për sherrin që kishte ndodhur mes dy të rinjve.
“Shkolla është shkaktari i parë i kësaj ngjarje. Unë shkollën e kisha 5 minuta larg nga puna ku punoja. Një mesazh mund të shpëtonte jetë. Unë mund të shkoja ta merrja djalin. Një mesazh i tyre mund të kishte shpëtuar një jetë”, tha Ëngjëll Cani, babai i të Martinit në “Shqipëria Live”.
Ndërkohë një ditë më parë Prokuroria dënoi me 16 vite burg, autorin e ngjarjes Mario Përlleshaj. Ky i fundit i mori jetën Martin Canit më 18 nëntor të vitit 2024, në Tiranë, rreth 200 metra larg shkollës “Fan Noli”.
Konflikti mes dy adoleshentëve kishte nisur tri ditë para ngjarjes, brenda ambienteve të shkollës për motive të dobëta. Edhe pse në dukje ishte shuar, konflikti u rindez sërish brenda shkollës. Të dy të miturit u përplasën në tualetet e shkollës gjatë paradites kur ndodhi ngjarja dhe debatuan ashpër, por u ndanë nga roja i sigurisë.
Pas mësimit, të shoqëruar nga miqtë e tyre, ata u takuan pranë shkollës, ku konflikti u përshkallëzua në një përleshje fizike, duke përfunduar me vrasjen e Martinit dhe plagosjen e Luis Meçes.
