Taulant Muka është një i ri që ngjalli shpresë. Për disa muaj me radhë denoncoi politikat e gabuara arsimore në Shqipëri. Tashmë është emëruar zv/ministër Arsimi…duke zhgënjyer jo pak ata disa nga ata që e besuan. Emërimi është publik dje, ndërsa Muka ende nuk e ka komentuar këtë zhvillim. Jo pak shqiptarë, e kritikojnë në rrjetet sociale pasi shpresuan se do ta vazhdonte rebelizmin e tij dhe “luftën” duke mos u bërë pjesë e sistemit.
I diplomuar në Shqipëri për Mjekësi, ai u largua nga vendi për të ndjekur studimet në Holandë.
Shkencëtari që vepronte në Danimarkë dhe Holandë, u bë i njohur kur tregoi se si një shqiptar i padiplomuar mund të bëhet shkencëtar përmes publikimeve në revista shkencore “grabitqare”.
Për ta faktuar këtë, ai tregoi historinë e dy gjysheve të tij me nga 3 vjet shkollë, që për pak ditë u shndërruan në shkencëtare.
Më tej ai vijoi duke denoncuar për plagjiaturë në botimet e tyre shkencore zv/ministrin e Arsimit, Ervin Demo dhe deputeten socialiste, Blerina Gjylameti.
Demo dha dorëheqjen para pak ditësh. Ndërsa Rama emëroi në vend të tij denoncuesin, Taulant Mukën. Për fatin e deputetes, heshtet. S’ka as dorëheqje dhe as zëvendësim.
Deri të paktën para pak muajsh mediat shkruanin se ai ishte punësuar pranë gjigandit farmaceutik danez, Novo Nordisk. I riu që ka prekur edhe auditoret e Harvard e Kembrixh merrej me kërkimin shkencor dhe zhvillimin e kurave të reja për diabetin.
Megjithatë, ai përherë e ka pasur një sy nga Shqipëria. Ka dashur përherë të kthehet.
Në qershor të 2017-ës iu përgjigj thirrjes së kryeministrit Rama për të ardhur dhe kontribuar në Shqipëri. Por ndryshe nga entuziazmi i Taulantit, nga Tirana i erdhi vetëm heshtje.
“Rama krijoi një platformë për të gjithë shqiptarët profesionistë në vendet e huaja, ku u bënte thirrje që të ktheheshin dhe të investonin në vendin e tyre. I shkruajta se do të ishte kënaqësi për mua që të kontribuoja. Por nuk mora asnjehëre asnjë përgjigje, madje as një “faleminderit për aplikimin tuaj”. Kjo është një shenjë se sa e vërtetë është politika në atë që thotë se bën, megjithatë unë sërish nuk kam hequr dorë nga kjo ëndërr. Ka plot mënyra të tjera se si mund të investosh në Shqipëri dhe unë do i bëj përpjekjet e mia që brezat e rinj, atë eksperiencë që ne kemi marrë, sadopak të kenë mundësi ta marrin edhe ata”, shprehej ai para disa javësh.
Ai gjithashtu ka tentuar të japë leksion te Mjekësia, por edhe aty pa përgjigjie. “Para se të vija në Shqipëri këtë herë, i shkruajta dekanit të Mjekësisë, nëse mund të jepja një ditë leksion për studentët e Mjekësisë, por nuk mora asnjë përgjigje”, shprehej ai.
“Si popull, jemi ndër popujt më analfabet në leximin dhe interpretimin e të dhënave shkencore, e për pasojë ndër më të paaftit në politikbërje.”
Kështu shprehej Taulanti para pak kohësh, para se të ishte emëruar zv/ministër. Presim si do të ndryshojë pikëpamje pasi të ketë ofruar eksperiencën e tij.
