Një ngjarje e rëndë është shënuar në orët e para të mengjesit në kufirin greko-shqiptar. Abc News ka mësuar se ka patur shkëmbim zjarri mes një grupi grabitësish shqiptarë dhe policisë greke.
Në Agio Nikola, Filat të Igumenices, policia greke ka pikasur një grup prej 5 personash që po tentonin të kalonin ilegalisht kufirin nga Greqia në Shqipëri. Në ndjekje të tyre u vu skuadra e OPKE, sektori kundër narkotikeve dhe dy skuadra të policise kufitare. 5 personat shoqëronin 2 mushka.
Gjatë tentativës së policisë për ti ndjekur, skuadra prej 5 personash hapi zjarr ndaj policisë dhe të njëjtën gjë bëri policia. 3 prej tyre arritën të kalonin në tokë shqiptare, në një zonë pyjore ndërkohë që u kapën dy prej tyre, shqiptarë të moshës 16 dhe 46-vjeç.
46-vjecari bëri rezistencë të fortë gjatë arrestimit, duke plagosur lehtë një oficer policie.
Dy mushkat rezultuan të ngarkuara me 4 bagëti të therrura, të vjedhura në një stan në Agio Nikola, Filat.
Nga hetimet e deritanishme rezulton se ky grup, ishte organizuar prej 4 muajsh për grabitje kafshësh në zonën e Filatit, Igumenicë. Ata hynin ilegalisht në Greqi nga mali dhe pasi vidhnin kafshët, i transportonin ato të gjalla ose të therura drejt Shqiperisë, ku mendohet se i shisnin.
