Dëm me pasoja të pallogaritshme është shkaktuar orët e fundit në Pogradec, ku është shkatërruar një segment rrugor i rrugës së vjetër “Egnatia” me gjatësi 80 metra.
Kjo ka ndodhur gjatë punimeve të një hidrocentrali në Velçan dhe policia e Korçës, njoftoi nisje procedimi penal për kompaninë ndërtuese.
“Po procedohet penalisht në gjendje të lirë administratori i firmës private që kryente punimet, E.K, 51 vjeç, banues në Tiranë, për veprën penale “Shkatërrimi i rrugëve”.
Specialistët e Seksionit për Krimet në Komisariatin e Policisë Pogradec, thanë për noa.al se filluan procedimin penal në gjendje të lirë ndaj 51-vjeçarit, pasi ai, “duke qenë me detyrë administrator i një shoqërie e cila po kryhen punime për ndërtimin e një Hidrocentrali në Njësinë Administrative Velçan, (gjatë punimeve) ka dëmtuar një segment rrugor me gjatësi 80 m dhe gjerësi 1.5 m, e cila i përket rrugës së vjetër Egnatia”.
Policia tha se materialet i kaluan Prokurorisë të Rrethit Gjyqësor Pogradec, për veprime të mëtejshme, neni 155 i Kodit Penal.
