Sot përfundon afati që qytetarët i lanë kryeministritRama për të shkarkuar nga detyra ministrat Bledi Çuçi dhe Mirela Kumbaro si dhe kreun e Policisë, Gledis Nano. Kujtojmë se me datë 4 gusht aktivistë, politikanë dhe qytetarë dolën në protestë para Ministrisë së Mbrojtjes për të protestuar për vrasjen e Jonada Avdias, e cila u qëllua për vdekje me skaf nga efektivi i policisë Arjan Tase. Ditën e 4 gushtit në protestën me moton “Drejtësi për Jonadën” Dhe “Nuk e vrau varka, e vrau shtet” ata i lanë afat Ramës 72 orë që të merrte masa dhe të vinte para përgjegjësisë ministrat, në të kundërt do të vazhdojnë protestën derisa të arrijnë drejtësi.
Deri më tani kryeministri nuk ka marrë asnjë masë, përkundrazi ka vazhduar me postime në rrjetet sociale sikur të mos kishte ndodhur asgjë, duke injoruar totalisht ngjarjen e rëndë ku një polic i mori jetën një fëmije 7-vjeçe.Kështu, sikur ishte parashikuar ditën e sotme pritet të zhvillohet sërish protestë në orën 19:30 përballë ministrisë së Brendshme. Protestës të para disa ditëve iu bashkuan edhe krerët opozitarë, Sali Berisha dhe Ilir Meta të cilët kanë shprehur mbështetjen e tyre edhe për protestën e sotme.
Jonada Avdia, 7-vjeçarja nga Tropoja, u vra në breg të detit ndërsa ishte duke u larë me të atin. Ajo u godit nga skafi i drejtuar nga komisari Arjan Tase, tashmë i arrestuar. Ngjarja ngjalli zemërim të madh në opinionin publik për faktin se Tase, në kohën kur drejtonte komisariatin e Himarës ishte nën hetim për favorizimin e trafikut të drogës. Por akuzat ndaj tij u pushuan dhe vetëm një muaj pas u rikthye në detyrë.
