Gjykata e Elbasanit vendosi sot lirimin nga paraburgimi të 16 personave që u arrestuan dy ditë më parë, pas pezullimit të dy kompanive të ferrokromit për ndotje të konsiderueshme mjedisore. Seanca, e cila nisi rreth orës 12:30, u zhvillua me dyer të mbyllura dhe zgjati disa orë.
Para trupit gjykues u paraqitën nëntë shtetas të huaj dhe shtatë shqiptarë, duke përfshirë drejtues, specialistë teknikë dhe punonjës të kompanive, ndër ta edhe administratori korean, Juncheol Chung, 64 vjeç.
Gjykata arriti në përfundimin se masat e arrestit në burg për ta ishin të paligjshme.
Pas hetimeve të nisura nga ankesa e banorëve të zonës së Bradasheshit, policia dhe prokuroria e Elbasanit, në bashkëpunim me Inspektoratin Kombëtar të Mbrojtjes së Territorit, zbuluan shkelje të rënda mjedisore nga dy kompani që operonin në zonën e ish-Metalurgjikut, në sektorin e ferrokromit dhe aleacioneve të hekurit, konkretisht CCAlb dhe GSA Ferrokrom. Të dy subjektet rezultuan duke ndotur ajrin, ujërat dhe tokën.
Kontrollet në terren treguan se GSA Ferrokrom nuk trajtonte dhe nuk dërgonte mbetjet e hirit nga sistemi i pluhur kapjes tek operatorët e licencuar. Ndërsa CC ALB nuk respektonte standardet për riciklimin dhe asgjësimin e mbetjeve të baterive.
Si pasojë e këtyre shkeljeve, aktiviteti i kompanive u pezullua dhe u gjobitën me 10 dhe 3 milionë lekë të rinj, ndërsa në pranga ranë jo vetëm administratorët Ilir Londo dhe Ergis Flaga, por edhe drejtorë prodhimi, inxhinierë/drejtues teknik, përgjegjës turni, operator furre dhe punonjës të tjerë.
Gjithashtu, nën përgjegjësi penale u vendos shefi i Sektorit të Mjedisit në Bashkinë Elbasan për veprat penale “Shpërdorimi i detyrës” dhe “Falsifikimi i dokumenteve”.
gijotina.com/
