Deputeti i PD Tritan Shehu, në një intervistën për BalkanWeb deklaroi se fenomeni i largimit të mjekëve ka arritur në një shifër të frikshme për 1 mijë banorë.
“Fenomeni i largimit të mjekëve, apo numri tragjikisht në rënie i mjekëve për 1 mijë banorë, është simptomë, jo sëmundje. Është pasojë e problemeve të mëdha që ka sistemi i shëndetësisë në vend. Kemi arritur në një shifër të frikshme të mjekëve për 1 mijë banorë. Kemi arritur në shifrën e 1.1 mjek për 1 mijë banorë. Ku mesatarja është 3-4 mjekë për 1 mijë banorë”, u shpreh Shehu, ndërsa shtoi se kemi rënë në shifra që mund të çojnë në kolaps sistemin shëndetësor.
Duke u ndalur në arsyet që çuan në këtë rënie të numrit të mjekëve për 1 mijë banorë, Shehu thotë se nuk janë vetëm pagat e ulëta, por rendit edhe kushtet që ofron sot sistemi i shëndetësisë, problemet e kualifikimit e të specializimit, literatura e ulët në dispozicion të mjekëve.
/balkanweb/
