Sekretari i Përgjithshëm i OKB-së Antonio Guterres, paralajmëroi për një diskriminim në ofrimin e shërbimeve publike për të trajtuar COVID-19, sëmundje kjo që ka vrarë më shumë se 184,000 njerëz në të gjithë botën.
Guterres tha se shpërthimi, ka sjellë “një rritje të gjuhës së urrejtjes, shënjestrimin e grupeve të cenueshme”.
Pa emërtuar ndonjë vend apo parti, Guterres paralajmëroi se me “nacionalizmin etnik në rritje, populizëm, autoritarizëm dhe një reagim kundër të drejtave të njeriut në disa vende, kriza mund të shërbejë si arsye për të miratuar masa shtypëse për qëllime që nuk kanë lidhje me pandeminë”.
Ndërkohë më shumë se 2.6 milionë njerëz në botë tashmë janë infektuar me koronavirusin e ri, sipas të dhënave nga Universiteti Johns Hopkins.
Megjithatë, niveli i vërtetë i numrit të të infektuarve dhe vdekjeve besohet të jetë shumë më i lartë, për shkak të raportimit të ulët nga zyrtarët dhe sigurimit të dobët të të dhënave në disa rajone.
