Ambasada amerikane në Tiranë bën me dije se ka dhënë një tjetër ndihmë ekonomike që kap shifrën e 5.5 milionë dollarë për Shqipërinë.
Përmes një mesazhi në “facebook”, ambasada e SHBA thekson se kjo shumë do të shkojë për ngritjen e Akademisë Amerikano-Shqiptare të Transparencës.
Njoftimi i Ambasadës Amerikane
Shtetet e Bashkuara njoftojnë me kënaqësi një ndihmë tjetër zhvillimi për Shqipërinë, në shumën 5.5 milionë dollarë, për ngritjen e Akademisë Amerikano-Shqiptare të Transparencës (USATA). Kjo Akademi do të rrisë transparencën dhe integritetin e qeverisë dhe të institucioneve publike e private, si dhe do të mbështesë reformën në drejtësi.
Akademia do të ndihmojë gjithashtu Qeverinë e Shqipërisë të menaxhojë donacionet e marra për rimëkëmbjen nga tërmeti, si dhe fondet e tjera publike, në një mënyrë transparente dhe të përgjegjshme që do të jetë në dobi të atyre që kanë më shumë nevojë. Kjo ndihmë është pjesë e kontributit mbi 700 milionë dollarë të Shteteve te Bashkuara për Shqipërinë në 20 vitet e fundit.
