Emërimi i Serdar Hoxhës, ish-kandidatit të Tom Doshit për 25 prillin në krye të Inspektoratit të Ndërtimit për veriun, ka ngjallur reagimin e PD.
Deputetja, Orjola Pampuri me anë të një deklarate për mediat, tha se ky emërim ka për qëllim blerjen e votave gjë që sipas PD, e ka bërë dhe në zgjedhjet e përgjithshme. Pampuri tha se Hoxha është ushtar i Tom Doshit, si dhe shtoi se ka akoma në prokurori një dosje të paverifikuar për të shkuarën e tij kriminale, ndërsa nuk harroi të përmendë dhe Majlinda Angonin.
“Pasi emëroi kandidaten për kryebashkiake ne Shkodër, Tom Doshi rikthen në detyrë edhe Serdar Hoxhën, në postin e kryeinspektorit për Veriun në Inspektoratin e Ndërtimit. Riemërimi i tij në këtë post ka për qëllim blerjen e votave në zonën e Velipojë gjë të cilën ai e bëri dhe në zgjedhjet e përgjithshme. Ushtari i Tom Doshit ka akoma në prokurori një dosje të paverifikuar për të shkuarën e tij kriminale, por kjo nuk e ka penguar qeverinë ta emërojë atë në një detyrë të rëndësishme. Qëllimi është i qartë. Paratë e krimit dhe të drogës, postet e shtetit t’i përdorin për të blerë vota. Skema tashmë është e qartë, Tom Doshi njeriu që vendos për gjithçka në Shkodër në emër të Edi Ramës, emëron persona të inkriminuar për të përfituar vota. Duke i lënë sërish në dorë Tom Doshit, përzgjedhjen e kandidates për kryetare Bashkie, emërimet në administratë, Edi Rama ka konfirmuar sërish marrëdhënien e tij të ngushtë me personin që SHBA e shpallën non grata për shkak të së kaluarës së tij kriminale, dhunimin e të drejtave të njeriut dhe përfshirjen në korrupsion”, tha Pampuri.
Ndër të tjera, PD sulmoi Sali Berishën duke e quajtur koalicioni “Shtëpia e Lirisë” si parti e nongratave, ndërsa bën thirrje që qytetarët të votojnë kandidatin e PD më 6 mars.
