Kryeministri Edi Rama ka reaguar për situatën e zjarreve në ishullin e Sazanit, ku ndërsa flakët rrezikojnë përhapjen e mëtejshme, kryeministri ka publikuar një video të drejtorit të Emergjencave Haki Çakos në helikopter.
Kreu i qeverisë ka publikuar dhe postimin e ministrit Niko Peleshi në rrjetet sociale ku falenderon ekipin e zjarrfikësve për menaxhimin e situatës, e cila në të vërtetë nuk ka asnjë përmirësim pasi flakët kanë sjellë dhe shpërthimin e municioneve që ishin aty pranë.
“Sakrifica dhe profesionalizmi i Forcave të Armatosura dhe të gjithë sistemit të Mbrojtjes Civile meritojnë mirënjohje. I vlerësoj të gjitha shqetësimet dhe mendimet e shprehura pa teklif, por ne mbështetemi tek ekspertët e fushës që vlerësojnë se teknika më efikase në rastin e zjarrit në ishullin e Sazanit është izolimi i vatrave nga toka duke krijuar breza të shpyllëzuar rreth çdo vatre…
Fatkeqësisht edhe kjo verë do të jetë shumë e nxehtë. Ne do të jemi përkrah bashkive për të mbështetur përballimin e emergjencave të mundshme. Por kemi nevojë edhe për vullnetarizëm dhe angazhim nga të gjithë për të përballuar së bashku situatat e emergjencave, në vend që t’i ndezim akoma më shumë nga tastiera”, thuhet në njoftim.
Ndërkohë që këtë të hënë, më 6 qershor, bëhen tre ditë që flakët kanë “pushtuar” ishullin e Sazanit dhe situata në terren ka agravuar.
