Nga Bit Gecaj
Çohet burri i botës, fluturon 15 orë, nga Kanadaja drejt Tiranës, më falni Samitit! Blen biletën e aeroplanit me paratë e veta, me të cilat do të mund t’i qeraste fëmijët e tij. Akomodohet në hotelet e Tiranës mirë e mirë, taksinë e paguan po me paratë e veta dhe si shpërblim gjatë rrugës taksisti, që ka qëlluar ish-kuadër partie, të bymon me bëma e heroizma shqiptare të tranzicionit! Dhe kështu, përderisa të gjitha rrugët çojnë në Samit, atje të shfaqet perdja e kuqe si gjaku! Pak më vonë fillon shfaqja e dylberëve plot grimasa, mbushur me rite e vese komuniste, me betime e parulla të paketuara patriotike! Dhe pa vonesë, e ridizajnuar në skenë shfaqet fytyra e Partisë Komunise, e kuqe all si gjaku. Por, ti tashmë nuk i njeh ngjyrat, ke rënë në gropë! Partia është kujdesur mire që ti të entuziasmohesh, të duartrokasësh, të ngrihesh në këmbë i ekzaltuar dhe në fund, aty afër fundit, bie në ekstazë partishmërie, deri në atë mase ku nuk mund të dallosh frazën e përsëritur shpesh, të Edi Ramës, në Kuvendin e Shqipërisë: “ti je ka*, që ty të vjen sikur: “ti je dylber”!..
Dhe kështu nga Samiti në Samit, doza e kleptomanisë do të rritet, numri i duartrokitësve do të shtohet! Në fakt samiti nuk do të përfundojë kurrë, sepse speciet pjesëmarrëse tashmë janë ngjizur. Ata rrinë në këmbë, dëgjojnë rrëfimet për pjesën tjetër të atdheut, Kosovën, dëgjojnë se kufiri i saj është i pacënueshëm, bashkë me sovranitetin, edhe pse dikush nuk mund të shkojë në shtëpinë e tij, që nga viti 2001, në pjesën veriore të Mitrovicës!
Gjithesesi, ka të tillë që mendojnë se të jesh samitist i Tiranës, ja vlen! Mbase ja vlen sepse është i vetmi vend në botë, që shpesh i duartrokitet hipokrizisë, gjatë i duartrokitet, mbase edhe zhgënjimit, se aty mungoi Aleksander Vuçiçi, për t’i vënë majë proletariatit të ri ballkanik!
Gjithesesi jeta vazhdon, sepse një samitist është i fortë, ka vizion, largohesh ngadalë nga Tirana, i vetëdijshëm se jo gjithçka arrihet përbrenda një samiti, por edhe se ka një rrugë tjetër, që mund t’i ketë mbi 20 orë fluturim, ku do të ketë kohë të mjaftueshme rezonimi e reflektimi për Partinë e Atdheun!..
