Pas konfirmimit të Gjykatës së Apelit për 1 vit burg për deputetin Ervin Salianjin është hedhur shorti nga Prokuroria e Tiranës për të caktuar prokurorin ose prokuroren e çështjes. Mësohet se shorti ka caktuar prokuroren Elona Alvora për ekzekutimin e vendimit te apelit të dënimit me 1 vit burg të deputetit demokrat Ervin Salianji. Urdhri ekzekutimit pritet ti dorëzohet policisë, ndërkohë që më parë deputeti do të ftohet ta zbatojë vullnetarisht.
Gjykata e Apelit ka lënë në fuqi ditën e djeshme, 26 shtator 2024 vendimin për dënimin me 1 vit burg për deputetin demokrat Ervin Salianji. Salianji është dënuar së bashku me Albert Veliun, që pritet të vuaj dënimin me 10 muaj burg si dhe gazetarin Jetmir Olldashi me 100 orë punë komunitare. Apeli në vendimin e sotëm, ka lënë në fuqi vendimin e Gjykatës së Shkallës së Parë në Tiranë.
Shkalla e parë vendosi që Salianji të dënohet për kallëzim të rrëmë, në lidhje me një denoncim që ka bërë për vëllanë e ish-Ministrit të Brendshëm Fatmir Xhafa, Agron Xhafa. Në audio-përgjimin që publikoi Salianji, thuhej se Agron Xhafa ishte pjesë e një rrjeti kriminal të trafikut të lëndëve narkotike.
Ndërkohë deputeti Salianji ka mbërritur mëngjesin e sotëm në Selinë e Partisë Demokratike, ku dhe është takuar me kreun e grupit parlamentar të PD-së, Gazment Bardhi.
Sot është njoftuar se do të mbahet edhe një mbledhje e grupit parlamentar ,ku do të përcaktohen edhe qëndrimet që do të mbajnë deputetët demokratë në kuvend dhe jashtë tij pas dënimit nga gjykata të Salianjit.
