Deputeti demokrat Ervin Salianji ka dalë kundër platformës të prezantuar nga Enkelejd Alibeaj për bashkimin e demokratëve, duke thënë se bëhet për interesa meskine.
Në një reagim në Facebook, Salianji hedh akuzat se platforma e paraqitur sot nga Alibeaj është e ndryshme nga sa i është paraqitur atij ditën e djeshme për të firmosur, duke thënë se përgatitja e këtij dokumenti mbyll rrugën për çdo diskutim dhe krijon premisat për ndarjen përfundimtare të PD.
“Çdo deklaratë e njëanshme pa marrë as dakordësinë për publikim të shumë prej kolegëve e përçan dhe ndan Partinë Demokratike, përforcon idenë që ka llogore dhe i fryn ndasive që ekzistojnë! Dokumenti i paraqitur është tërësisht i ndryshëm nga ai që personalisht mu paraqit dje 5 minuta para konferencës së anuluar për shtyp! Forma, mënyra dhe përgatitja e këtij dokumenti mbyllin rrugën për çdo diskutim të përbashkët dhe krijojnë premisat për ndarjen përfundimtare të Partisë Demokratike!
Përgjegjës për krijimin e 2 partive do të jenë ata që dukshëm po venë interesat e përfitimeve personale mbi interesat e demokratëve! Dorëheqjet duke mos hequr dorë nuk janë zgjidhje ashtu si çdo proces i njëanshëm është i dëmshëm për Partinë Demokratike! Pas deklarimit publik të këtij dokumenti mbyllet dera për çdo zë racional dhe për të mbrojtur çdo interes që zgjedhjet brenda partisë të jenë gjithëpërfshirës! Koha do të zbulojë se si kjo deklaratë publike bëhet për interesa meskine, me strategjinë e qartë qe Partia Demokratike të ndahet dhe të krijohen 2 parti!”, shkruan Salianji.
Kujtojmë se, kundër kësaj platforme kanë dalë dhe deputetët si Grida Duma, Ina Zhupa apo dhe Kasëm Mahmutaj që dikur ishin mbështetës të Bashës.
