Zyrtarët rusë kanë konfirmuar se zëvendëskomandanti i flotës ruse të Detit të Zi, kapiteni i rangut të parë Andrei Paly, vdiq në luftime në Mariupol. Më herët mediat ndërkombëtare raportuan se Ukraina pretendonte se e kishte vrarë. Luftimet e ashpra vazhdojnë në Mariupol, një qytet port i goditur nga granatimet ruse, raporton BBC.
Vdekja e Paly u konfirmua fillimisht nga sekretari i kolegjit detar Nakhimov, Konstantin Tsarenko, në rrjetin social Vkontakte. Më vonë, një senator rus nga Sevastopol, baza e Flotës së Detit të Zi në Krimenë e aneksuar nga Rusia tha në një postim se “Sevastopol ka pësuar një humbje të rëndë, të pariparueshme…Paly vdiq në betejat për çlirimin e Mariupolit nga nazistët. “Presidenti Vladimir Putin ka folur për fushatën e Rusisë për të çliruar Ukrainën nga “nazistët”, siç pretendon ai.
Burimet ukrainase kanë raportuar për vdekjen e pesë gjeneralëve rusë në luftime, qëkur Moska urdhëroi pushtimin e paprovokuar më 24 shkurt. Rusia ka konfirmuar zyrtarisht vetëm një nga këto viktima, Gjenerali Andrei Sukhovetsky.
