Kryeministri Edi Rama ka njoftuar se duke nisur nga muaji qershor do të ketë rritje pagash në disa shërbime kritike, me fokus të veçantë te sistemi shëndetësor.
Duke folur në podkastin “Flasim”, ai bëri të ditur se mjekët e urgjencës do të trajtohen në të njëjtin nivel për sa i përket rojeve dhe ngarkesës shtesë të punës. Shtesat mujore do të arrijnë në 18 mijë lekë për mjekët dhe 12 mijë lekë për infermierët dhe teknikët.
Sipas kreut të qeverisë, kjo politikë është pjesë e një faze të re të rritjes së pagave, që synon jo vetëm rritjen nominale të të ardhurave, por edhe mbrojtjen e fuqisë blerëse përmes mekanizmave të indeksimit çdo dy vite në sektorin publik.
Ai theksoi se ndërhyrja është e përqendruar te sektorët me përgjegjësi të lartë, si shëndetësia, arsimi dhe siguria, duke e cilësuar si një politikë të qëndrueshme që reflekton rritjen ekonomike të vendit dhe synon përmirësimin e mirëqenies së qytetarëve.
Kryeministri i Shqipërisë, Edi Rama, ka deklaruar se qeveria ka stabilizuar një skemë të rritjes së përvitshme të pensioneve, e cila pritet të përshpejtohet në vitet në vijim.
Sipas tij, rritja e aplikuar në janar të këtij viti do të dyfishohet në janarin e ardhshëm, do të trefishohet në vitin 2028, katërfishohet në 2029 dhe pesëfishohet në 2030, duke synuar përmirësimin gradual të të ardhurave për pensionistët.
Paralelisht, qeveria po përgatit edhe një kolonë të re në sistemin e pensioneve, që do të funksionojë si shtesë ndaj skemës ekzistuese. Kjo nismë synon të krijojë një mundësi të dytë mbështetjeje financiare për qytetarët në të ardhmen.
Modeli i ri parashikon që çdo punonjës të kontribuojë me një shumë të vogël nga paga e tij, ndërsa shteti ose punëdhënësi do të japë një kontribut të barabartë, duke krijuar një fond individual që i shtohet pensionit bazë.
Kryeministri theksoi se kjo skemë bazohet në modele të suksesshme ndërkombëtare dhe synon forcimin e sigurisë financiare për moshën e tretë, pa zëvendësuar sistemin aktual të pensioneve.
gijotina.com/
