Kryeministri Edi Rama ka lajmëruar se me ministret Belinda Balluku dhe Delina Ibrahimaj do të ketë sot në orën 09:00 takim me furnizuesit e naftës për pasojat e luftës në çmimet e karburantit, ku do t’i prezantojë me masën e parë.
“Nesër paradite në mëngjes, do të ulem në tryezë me të gjithë furnizuesit e naftës, i kemi thirrur të gjithë. Do t’i prezantojmë me masën e parë, me një akt normativ që hyn në fuqi menjëherë me forcën e ligjit që qeveria do të hyjë drejtpërdrejt në bordin kombëtar të furnizimit me karburant të shqiptarëve,” tha Rama.
Protestat masive në qytete të ndryshëm e detyruan Ramën të kthehet nga Dubai dhe të dalë në një bashkëbisedim me qytetarët, ku tha se brenda 48 orëve do të publikojnë masat e reja për menaxhimin e krizës. Një ndër masat e para që njoftoi Rama është krijimi i një bordi për naftën, ku sipas tij asnjë çmim në tregun e naftës nuk do të vendoset pa u miratuar më parë nga ky bord.
