Këngëtari i njohur Robert Berisha njihet për deklaratat e tij të papritura dhe shpesh nuk kursen askënd. Por, për Adelina Ismailin ka vetëm fjalë pozitive. Dy artistët janë miq të ngushtë. Historia e njohjes së dyshes nisi që në fëmijërinë tyre, pasi janë rritur së bashku në të njëjtën lagje dhe kanë qenë edhe në shkollë bashkë. Kështu ka treguar Roberti në intervistën e tij në emisionin “Why Not”.
Gjithashtu, ai u shpreh se nuk beson që një këngëtare e ditëve të sotme mund t’i arrijë sukseset që dikur i ka arritur Ismaili.
“Komshinj, me vite të tëra, jemi rritur bashkë, kemi qenë në shkollë të muzikës bashkë, në të mesmen dhe në Akademi. Pastaj në 99-tën lufta, unë ika në Amerikë. E kam pasur shoqe shumë të mirë. S’besoj që do të arrijë sot një këngëtare famën që e ka arritur kjo në vitet ’90, pa rrjete sociale. Edhe çmimet që i ka marrë Adelina Ismaili në vitet ’90, sot disa këngëtare që shprehen ‘Unë kam këtë çmim, atë çmim’ – kjo është vetëm përkohësisht. Kjo e ka marrë me vite të tëra atë çmim, ka qenë më e paguara dhe kjo s’ka mundur të dalë pa sigurim. Kjo ka qenë e izoluar në shtëpi sepse kjo ka qenë yll”.
Ndër të tjera Roberti ka treguar se ka qarë për herë të parë kur ka kënduar këngën që i ka dedikuar mamasë së tij. Kantautori u shpreh se në momentin që ka nisur të lexojë vargjet të cilat nuk i dinte përmendësh ka shpërthyer në lot.
“Kjo është këngë për nënën, teksti më ka pëlqyer shumë. Dhe është hera e parë që kam qarë atje në kabinë. Duke i lexuar strofat më erdhi për të qarë. Dhe kur një këngëtar nuk e di tekstin përmendësh nuk e këndon me shpirt. Më tha kur të vish pas një muaji e bëjmë përsëri se kemi kohë, por jo se nuk e ke dhënë shpirtin si herën e parë dhe e lamë në këtë vokal”.
