Deputetja e Partisë Demokratike, Grida Duma, ka reaguar në lidhje me projektligjin e krijimit të Regjistrit Kombëtar të të dënuarve për krime seksuale që nga viti 1995, i cili u diskutua këtë të mërkurë në Komisionin e Punës, Çështjeve Sociale dhe Shëndetësisë.
Përmes një postimi në Facebook, Duma shkruan se një projektligj i tillë është i munguar prej kohësh, por tepër i domosdoshëm për garantimin dhe mbrojtjen e fëmijëve.
Deputetja e PD-së informon se ky regjistër do të jetë i hapur të aksesohet nga njësitë për mbrojtjen e fëmijëve në çdo Bashki, zyrat arsimore apo në administratën publike.
Postimi:
Regjistri kombëtar për të dënuarit që kanë kryer krime seksuale që nga viti 1995.
Diskutuam në Komisionin e Punës, Çështjeve Sociale dhe Shëndetësisë, për krijimin e “Rregjistrit Kombëtar të të dënuarve për krime seksuale”.
Një projektligj i munguar prej kohësh dhe veçanërisht i domosdoshëm në garantimin dhe mbrojtjen e fëmijëve dhe familjeve tona.
Në Komision u paraqitën dy drafte, njëri nga deputetja Xhixho dhe tjetri nga 28 organizata perfaqësuese të shoqërisë civile.
Elementët kyçë mbi këtë projektligj janë:
Krijimi i regjistrit kombëtar i atyre që kanë kryer krime seksuale dhe grabitqarëve seksualë.
Ky regjister do të jetë i hapur të aksesohet nga njësitë për mbrojtjen e fëmijëve në çdo Bashki, Zyrat Arsimore Vendore, Administratat Publike për sa i përket rekrutimit të personave dhe prindërve.
Ndalimi i personave të dënuar dhe të rehabilituar, autorë të këtyre krimeve për t’u bërë pjesë e institucioneve arsimore publike dhe private, administratat publike dhe çdo lloj instance që mundëson kontakt me fëmijët.
Detyrë e institucioneve punëdhënese për të kërkuar një vërtetim përpara rekrutimit të individëve.
Raportimi i detyrueshëm i personave që kanë kryer dënime të krimit seksual, për të deklaruar në Policinë Vendore për lëvizjet e tyre, qoftë ato brenda dhe jashtë vendit.
