Ministria e Jashtme e Maqedonisë kërkoi sot qëndrim zyrtar nga Departamenti Amerikan i Shtetit për deklaratat e kongresmenit amerikan Dana Rohrabacher në intervistën e “Vizion Plus” nga Tirana. Maqedonia kërkoi shpjegime përmes ambasadës së saj në Uashington, për deklaratën e kongresmenit ku thekson se Maqedonia nuk është shtet dhe sygjeron ndarjen e Maqedonisë.
Kongresmeni Dana Rohrabacher, është anëtar i Komitetit për politikë të jashtme dhe kryetar i Nënkomitetit për çështjet evropiane. “Qëndrimet e tij të shprehura shkaktojnë shqetësim të madh rreth Maqedonisë dhe rajonit. Të njejtat nxisin edhe retorikë nacionaliste tek fqinjët, duke na kthyer në të kaluarën.”, thuhet në reagimin e MPJ.
Nga kjo ministri kërkohet që Departamenti i Shtetit në mënyrë të duhur të shmang çdo dilemë rreth qëndrimeve të shprehura dhe të shprehë afirmimin e politikave të saj për Maqedoninë dhe Ballkanin. (INA)
