Ambasadori i BE-së në Tiranë, Luigi Soreca ka reaguar për herë të parë për çështjen e Teatrit Kombëtar.
Përmes deklaratës së tij, Soreca u shpreh se çështja e Teatrit është mjaft e politizuar ndërsa BE-së i intereson vetëm sundimi i ligjit.
“Më seriozisht dëshiroj të them që kjo çështje është vërtet e rëndësishme dhe është pjesë e një debati intensiv që po bëhet në shoqërinë shqiptare, që janë përfshirë ndjenja dhe për këtë arsye është një çështje delikate, por edhe e politizuar. Sigurisht që nuk duhet të jemi ne ata që duhet të themi nëse duhet një ndërtesë e re apo rikonstruktim i së vjetrës, këtë duhet të thonë autoritetet shqiptare”, tha Soreca, ndërkohë që theksoi se BE-së i interesojnë procedurat e tenderimit.
Ashtu sikur e dini edhe ju pozicioni ynë ka qenë i qartë që nga shtatori i vitit të shkuar, BE i ka bërë thirrje qeverisë që të jenë transparent edhe pa qasje diskriminuese në treg. Ky duhet të jetë parimi që duhet të udhëheqë autoritetet shqiptare, prandaj është lancuar edhe tenderi për më tej. Mendoj se është shumë e rëndësishme që të ketë kritere të qarta edhe transparente, edhe të ketë një qasje të drejtë per këtë cështje. Ajo që është e rëndësishme për ne është sundimi i ligjit, procedurat e tenderit duhet të jenë në përputhje me ato të BE-së, mesa di tenderi është i hapur deri në 19 shtator. E rëndësishme është edhe konkurrenca e lirë dhe e drejtë”, është shprehur mes të tjerave Soreca.
