Raporti i KLSH “fundos” Alqi Bllakon, si përvetësoi 220 mijë USD në krye të Ujësjellës-Kanalizimeve

Raporti i Këshillit të Lartë të Shtetit “nxin” akoma më shumë ish-deputetin socialist, Alqi Bllako, i cili u arrestua me urdhër të SPAk për akuzën e përfitimit të 15 milion lekëve ryshfet, përmes babait të tij. Gjatë kohës që drejtonte Agjencinë Kombëtare të Ujësjellës-Kanalizimeve dhe Infrastrukturës së Mbetjeve gjatë përiudhës shkurt 2019 dhe prill 2021, Bllako ka përfituar qindra mijëra dollarë tendera. Në raportin e auditimit të siguruar thuhet se Alqi Bllako, vetëm përmes 3 kontratave për përmirësim të rrjetit të kanalizimeve, ka shkarkuar 22 milionë lekë ose rreth 220 mijë USD dëm ekonomik, me pagesa për punë të pakryera nga kompanitë e kontraktuara.
Nga verifikimi i kontratës së nënshkruar nga Ballako për përmirësimi i furnizimit me ujë për lagjen Krastë e Vogël, Harmës dhe qytetin e Elbasanit, janë paguar rreth 100 mijë USD për punime fiktive. Rreth 80 mijë USD për punë të pakryera janë paguar për zbatimin e kontratën për Përmirësimi i Infrastrukturës së Ujërave të Zeza në Vlorë, si dhe 37 mijë USD për ndërtim kolektori në Gjirin e Lalzit. KLSH kërkon që kompanitë që kanë zbatuar këto kontrata, duke të kthejnë paratë mbrapsht në arkën e shtetit.
Sipas raportit, agjencia nën drejtimin e Alqi Bllakos ka shpallur fituese, pa plotësuar kriteret, kompanitë “G.E.S.T” & “A. shpk”, për tenderin e pajisjes me matësa dhe pajisje për ndërmarrjet Durrës, Elbasan, Lushnjë, Vlore, Fier dhe Kavajë, me ofertë 300,631,377 lekë pa tvsh ose rreth 3 milionë USD.
Sipas KLSH, në kundërshtim me ligjin janë shpallur edhe kompanitë fituese të tenderit për përmirësimin e infrastrukturës së ujërave të zeza në zonën bregdetare Vlorë”, , zhvilluar me ofertë fituese 389 milionë lekë ose rreth 3.9 milionë USD.
Audituesit e Kontrollit të Lartë të Shtetit kanë konstatuar gjithashtu shkelje në prokurime me vlerë të vogël si dhe abuzime me kosto ekonomike në procesin e shpronësimeve nga agjencia.
Në raport thuhet gjithashtu se Agjencia Kombëtare e Ujësjellës-Kanalizime dhe Infrastrukturës së Mbetjeve, gjatë periudhës së auditimit 2019-2021, ka humbur edhe 10 procese gjyqësore, me kosto rreth 1 milionë euro, për dëmshpërblim për ndërprerje të paligjshme të marrëdhënieve të punës, dёmshpёrblime për shpronësime nё masë tё padrejtë si dhe dёmshpёrblim për kontratat e investimit.
Agjencia ka lidhur kontrata me kompani për kryerje punimesh pa pasur fondet e plota, ndërsa nuk ka raportuar në KLSH për zbatimin e rekomandimeve të lëna nga auditivet e mëparshme.