Kreu i grupit parlamentar të PD, Enkelejd Alibeaj ka reaguar lidhur me raportin e Departamentit Amerikan të Shtetit, ku rendiste problemet kryesore në vend, ndërsa veçonte korrupsionin si shqetësimin më të madh.
Në një reagim te gjatë, Alibeaj shkruan se raporti i DASH vërtetoi akuzat e PD se qeveria e Edi Ramës nuk gëzon mbështetje e SHA, dhe gjithashtu DASH konfirmon faktin e ngritur me zë të lartë nga PD për blerjen dhe manipulimin e votës.
“Korrupsioni ishte i përhapur në të gjitha degët e qeverisë dhe zyrtarët shpesh u përfshinë në praktika korruptive pa u ndëshkuar”, thotë raporti duke konfirmuar atë që ne, Partia Demokratike e Shqipërisë, kemi thënë e faktuar prej vitesh. Raporti i DASH është skaneri më i qartë se qeveria e Edi Ramës është e keqja më e madhe e shqiptarëve dhe dëshmia se kjo qeveri nuk e gëzon më mbështetjen e SHBA. Të dashur qytetarë, demokracia më e madhe në botë nuk e pranon kurrsesi qeverisjen e korruptuar dhe të lidhur me krimin, pasi siç thotë raporti “Policia nuk e ka zbatuar gjithmonë ligjin në mënyrë të barabartë. Lidhjet personale, politike ose kriminale, infrastruktura e mangët, mungesa e pajisjeve dhe mbikëqyrja e pamjaftueshme shpesh patën pasoja në zbatimin e ligjit”. DASH konfirmon faktin e ngritur me zë të lartë nga PD, blerjen dhe manipulimin e votës duke renditur një seri faktesh në raport e ku edhe në këtë rast konfirmon akuzat e opozitës. “Raporti i Organizatës për Siguri dhe Bashkëpunim në Evropë, theksoi disa mangësi, duke përfshirë blerjen e votave, rrjedhjen e të dhënave të ndjeshme personale dhe avantazhin e konsiderueshëm të fituar nga partia në pushtet për shkak të të qenit në pushtet”, fakt ky i bërtitur nga PD para, gjatë dhe pas zgjedhjeve të 25 prillit 2021”, shkruan Alibeaj.
Sipas deputetit demokrat, SHBA ka ngritur shqetësime dhe për sistemin e drejtësisë, ndërsa shton se këto janë denoncime që PD i ka bërë çdo ditë dhe se ky raport dëshmon se SHBA është në krah të shqiptarëve.
