Partia Demokratike ka reaguar pas raporti të DASH, ku Shqipëria konsiderohej si bazë lokale për trafikantët ndërkombëtarë të drogave.
Deputeti demokrat Ervin Salinaji akuzoi qeverinë se ia ka dorëzuar sovranitetin bandave, duke i përdorur në raste zgjedhjesh për të siguruar vota, dhe shpërblyer më pas me poste të rëndësishme.
“Praktikisht qeveria shqiptare ja ka dorëzuar sovranitetin dhe kontrollin në territor bandave të krimit të organizuar, për fat të keq pasi përdoren në zgjedhje për të grumbulluar vota duke kërcënuar, intimiduar dhe blerë vota për rilindjen ata shpërblehen me emërime në postet kyçe qeveritare, me kontrollin e emërimeve në administrate dhe ju ofrohet paprekshmëri në aktivitetin e tyre kriminal! Pavarësisht kambanave të forta të alarmit dhe reagimeve të përvitshme të DASH qeveria shqiptare nuk bën asnjë përpjekje serioze për luftën ndaj krimit të organizuar dhe korrupsionit. Sepse për këtë qeveri interesi i një grushti njerëzish prevalon ndaj interesit të shtetit dhe qytetarëve, për këtë qeveri prodhimi i parave të pista për organizatën e saj vlen më shumë se shkretimi i përditshëm qe po i behet Shqipërisë për shkak te pabarazisë, papunësisë dhe varfërisë”, u shpreh Salianji.
Sipas Salianjit, Partia Demokratike e vlerëson raportin e DASH dhe do të bëjë përpjekje maksimale që politika të jetë instrumenti i zgjidhjes dhe jo krijimit të problemeve.
