Senatori republikan Rand Paul, është tërhequr nga gara për president të Shteteve të Bashkuara.
Vendimi vjen pas rezultatit zhgënjyes në Ajova, ku ai u rendit i pesti.
Tashmë ai pritet të fokusohet në rizgjedhjen e tij në Senatin amerikan.
Paul është parë si përfaqësues i krahut liberal të partisë së tij, që promovon të drejtat individuale dhe privatësinë.
“Në të gjithë vendin, me mijëra njerëz u grumbulluan rreth mesazhit tonë për privatësinë, reformën në drejtësi penale dhe për politikën e jashtme.
Edhe pse unë sot po e pezulloj fushatën time për president, lufta është larg përfundimit”, ka thënë ai.
Vitin e kaluar, revista Time e ka etiketuar atë si “njeriu më interesant i politikës”.
Me tërheqjen e tij, tashmë në garën e republikanëve kanë mbetur edhe dhjetë kandidatë që synojnë Shtëpinë e Bardhë, nga 17 sa kanë qenë fillimisht.
