Grupi parlamentar i Partisë Socialiste ka nisur mbledhjen e parë për zgjedhjen e Presidentit të ri, ku i pranishëm është edhe kryeministri Edi Rama.
Gjatë fjalës së tij, Rama nuk nguroi të sulmojë kreu aktual të Republikës, Ilir Metën duke thënë se në krye duhet të jetë dikush me integritet, ndërsa e konsideroi si Presidentin më skandaloz që kemi pasur.
“Por nga ana tjetër, ajo çka e bën këtë moment shumë përcaktues për karakterin, për ambicien dhe profilin e PS-së, nuk mjafton thjesht të zgjedhim një person që ishte më i përshtatshëm për atë rol se Ilir Meta, që do e përmbushnin si kriter 90% e shqiptarëve, por është që të zgjedhim një figurë, që në 5 vitet e ardhshme do të luajë rolin e kreut të shtetit, që të rrezatojë normalitet, që të ketë integritet, që të garantojë respekt të ndërsjellë mes institucionit të presidentit dhe partnerëve dhe aleatëve tanë strategjikë. Që të sigurojë gjithashtu një nivel profesionalizmi në adresimin e të gjithë gamës së çështjeve që lidhen me presidentin e Republikës, si dhe të përçojë një frymë përbashkuese për të gjithë qytetarët e RSH-së, përtej bindjes së tyre politike. Dhe këtu sfida vështirësohet, dhe përzgjedhja është shumë më e ngushtë, sesa do të ishte në sy të parë, zgjedhja e pasuesit të presidentit më skandaloz që ka njohur historia e këtij vendi, dhe presidentit më të papërsëritshëm që ka pasur vendi”, tha Rama.
Në mbledhjen e sotme, deputetët socialistë do të dorëzojnë një fletë me 3 emrat e tyre si kandidatë për postin e presidentit, që pritet të zëvendësojë Ilir Metën pas përfundimit të mandatit më 24 korrik.
Ndërsa ditën e nesërme, PS ka thirrur për konsultime krerët e grupeve parlamentarë të partive opozitare, Enkelejd Alibeaj, Mesila Doda dhe Fatmir Mediu, duke lënë jashtë lojë Komisionin e Rithemelimit dhe LSI.
