Në fjalimin e tij përpara delegatëve në Kongresin e PS, kryeministri Edi Rama nuk i ka kursyer batutat duke shkaktuar jo pak herë të qeshura në sallë. Kreu i qeverisë komentoi zërat që thonë se ai nuk i mbron bashkëpunëtorët e tij, duke thënë se PS nuk do të bëhet mburojë dhe zyrë avokatie.
Shpjegimi i këtyre komenteve shkaktoi të qeshura në sallë, pasi Rama kujtoi para socialistëve se ai nuk i ka borxh askujt nëse i merr koka erë, duke thënë se në botën tjetër më mirë të shkojnë siç shkonte ai në plazh, referuar fotos së famshme ku ai ishte nudo.
“Unë nuk lëshoj askënd në këtë familje që bëhet shënjestër për punët e përbashkëta, i vë gjoksin, i vë fytyrën dhe zërin në dispozicion dhe i dal unë përpara baltës që hidhet drejt kujtdo që është pjesëtar në këtë familje, kur është fjala për punë. Por unë nuk mbaj as nuk mbroj që besimin e marrë nga unë, nga kjo familje i përdor për të ngrënë pas shpinë zgjedhësit, familjen tonë edhe mua. Borxh nuk i kam askujt që i merr koka erë, vetëm kësaj familjeje dhe pikërisht që jam dhe i gjatë si mund të mbroj unë përballë ca të vegjëlve që mbajnë mikrofona, për çfarë, për ata që nuk ndalojnë së ngrëni dhe që ju them që në botën tjetër, madje këtu në Sharrë nuk punojnë kartat e kreditit dhe as parajsat fiskale. Më mirë përgatituni të shkoni siç dilja unë në plazh sepse asgjë nuk të dallon nga ata të tjerët”, tha Rama.
